एक ठो गाँव में दु झन छोट-छोट भाई बहिन रहैं । भाई, बड़ रहे और बहिन छोट। इमन के छोटे में छोइड के माय-बाप माइर गेलाय। बहिन बड़ रहे से ले हिंया-हुंवा भूती-बनी कार के मजदूरी में मिलल धान के घर लनत रहे ।
छोट भाई उसनल बाद थान के खिजूर कर पटिया में सुखात रहे। एक दिन अपन दीदी के काम नी मिललक से ले दूनो भाई-बहिन पटिया में धान सुखाय लगलाय। ओहे समय एक कौवा एक पकल केंद के ऊ मनकर धान पटिया में गिराय देलक। दूनो भाई-बहिन ई पकल केंद के बाँइट के खाय गेलाय और जानलाय कि बन में केंद पकाथे।
दूनो भाई-बहिन केंद खोजेक लागिन पतरा बटे चाइल गेलाय। बीच जंगल में ईमन के एक ठु केउन्द गाछ मिललक। ऊपरे देखलाय तो गाछ में लाले-लाल केन्द पकल आहे।
गाछ छोट और थेपड़ी ले रहे। छोड़ा (लड़का) कर दीदी गाछ में चाइढ़ गेलक और ढेर बागरा पकल केउन्द के गिरालक । दूनो भाई-बहिन एक जगन बैठ के पेटभर केउन्द खलांय ।
ई मने एतना केउन्द खलांय कि पानी प्यास लगेक लगलक । भला प्यास काले नी लगी कि, जेठ-बैसाख कर महीना रहे । अक्सर एहे महीना में केंउद पकेक लगेला। खूब गर्मी भी रहे | पानी पियास के मारे ई मन छटपाटत रहैं ।
आस-पास में कहीं भी पानी नी रहे । से ले अपन बहिन छोट भााई के एक बड़का गाछ कर ढोड़रो में लुकाय के अपने पानी खोजेक ले गेलक। आसे-पासे कहीं भी पानी की मिललाक। ढेर दूर में पानी बहेक कर आवाज सुनालक ।
से बेरा हुनहे ढेर दूर गेलक आउर भाई ले पानी लेते अलक और जोन गाछ केर ढोड़रो में उके लुकाय रहे हुंवा खोजेक लगलक लेकिन ऊ छौवा के नी पालक । ऊ कांदते-गगाते घर घुरेक लगलक ।
डाहर में उके एक राजा बेटा मिललक। ई उकर कांदेक कर कारन पूछलक तो ऊ सारी घटना के बताय देलक । राजा बेटा के लड़की केर दुःख-तकलीफ पर मया होय गेलक। लड़की सुन्दर भी रहे से ले राजा बेटा के लड़की में ओर दया आलक । लड़की बेसहारा होय रहे । राजा बेटा ऊ लड़की के अपन राजदरबर में ले गेलक आउर धूमधाम से शादी काइर लेलक और उके अपन रानी बनालक ।
ई राज दरबार में सुख-शान्ति से रहेक लगलक। ऊ लड़का (छड़ी कर भाई) के एकला पाय के बहुत सारा बन्दरा मने चीर-फाइड़ के खाय देलाय और ऊ लड़का कर छेबरा के बन्दरा मने डाहर में छोइड़ देलाय ।
ओहे डाहर से एक योगी आवत रहे । ऊ योगी ई चमड़ा के
देइख लेलक आउर योगी ई छेवरा (चमड़ा) से एक केन्दरा बनालक एहे केन्दरा के बजाय के भीख मंगेक लगलक । इकरे से उकर जीना-पानी चलत रहे । एक दिन ऊ योगी ओहे
राजमहल में जहाँ लड़का कर दीदी रानी बइन रहे । हुवाँ भीख माँगेक गेलक । केन्दरा के बजायक लगलक। केन्दरा से आवाज आवे लगलक-
तिमखी तिडिंग, तिमखी तिडिंग,पानी आने गेले दीदी हुंचाए रहले, दीदी हुंवाए रहले। सात ठु बन्दरा दीदी चीर खलाय दीदी, फाइर खालें दीदी ।
योगी केर केन्दरा कर गाना के सुइन के रानी के, अपन छोट भाई कर याद आय गेलक । ऊ दौड़ते बाहरे निकललक और देखलक कि योगी केन्दरा बजात रहे।
उकर भीतरे से उकर छोट भाई कर कंदेक कर आवाज अवात रहे, जे रानी-अपन-दीदी कर हृदय के अघात करते जात रहे। अपन दीदी ई गाना के सुइन के सहेक नी पारलक।
ऊ कान्देक लगलक । राजा गो रानी से कान्देक कर कारन पूछलक।
रानी सारी कहानी बताय देलक। रानी योगी के घर भीतरे ले गेलक और मुँह माँगा पैसा योगी के देलक और केन्दरा के अपन जगह राइख लेलक।
जब योगी पैसा लेई के चइल गेलक, तब रानी ऊ केन्दरा के जोर से पटइक देलक। जैसे केन्दरा फूटलक, उकर भीतर से रानी कर छोट भाई झकमकाते हँसते निकललक । राजा-रानी उ लड़का के देइख के बहुत खुश होइ गेलाय ।
दोनों भैया-बहिन खुशी के मारे गला मिलाय लेलांय ओर नाचेक लगलें । इकर बाद रानी अपन भाई के अपन राजमहल में राईख लेलक। दोनों भाई-बहिन प्यार, खुशी आउर आनन्द से संगहे रहे लगलाय।
ई कहानी से हमे सिखली जे " विपत्ति में भगवान दुःखी के सहारा करेला। "
एक टिप्पणी भेजें