अन्धा राजा और अन्धी रानी
Blind King and Blind Queen
लड़की जब जवान सेयान होइ गेलक तब उमन के अपन बेटी के शादी करेक लागिन चिन्ता होवेक लगलक | इमाने अपन बेटी लागिन लड़का खोजेक ले राइज राइज बुललांय लेकिन उमन कर जैसन सुन्दर आउर धनी मानी घर कर लड़का नी मिललाक | उमाने हाइर गुइन के लड़की के अपने से लड़का खोजेक ले कहलांय।
रानी बेटी अपन से लड़का खोजेक ले निकललाक। ऊ हिने हुने लड़का खातिर घूमेक-फिरेक लगलक | जात जात उके एक लड़का से भेंट होलाक, उकर नाम रहे सत्यवान । ऊ एक बहुत गरीब घर कर छोंडा (लड़का) रहे।
ऊ लड़का छागरी चरात रहे । छागरी के खियायक ले डाहुरी काइट के उतरेक बेरा गाछ से गिर गेलक सेबेरा उके रानी बेटी बचाय लेलाक | उकर सेवा सुत्रा करलक |
धीरे धीरे दुइयो झन कर बीच में प्यार होइ गेलक। रानी बेटी लड़का के कहलक कि, तोंय मोके शादी करबे ?
लड़का जवाब देलक " मोंय एक गरीब घर कर हिकों | राज खानदान में मोंय शादी नी करबों "
लड़की अपन माय-बाप से पूछलक उमाने भी गरीब लड़का संगे शादी करेक ले राजी नी होलांय |
एक बार ऊ लड़का सत्यवान, जोर से बीमार होइ गेलक | ऊ मोरेक-मोरेक लेखे होलाक | राजा कर बेटी खबर पाय के उके देखेक ले उकर घर गेलाक |
ऊ मोरेक नीयर होलाक से ले, भगवान उके लानेक ले यमदूत मनके भेजलक | यमदूत मने उके लेगेक ले आलांय और उके लेगेक लगलांय | पारबती उके लेगेक से यमदूत मन के मना करलक लेकिन, उमाने नी मन लाएं | तब पार्वती कहेला कि " इके तोहरे मने ना ले जावा "
उमने पूछायँना कि काले इके नि लेगाब | तो पार्वती कहेला " ई हमर पति हिके | दया-मया काइर के इके ना लेजावा " फिर भी ई मने उके लेगायना | पार्वती उमन कर पीछा नी छोड़ेला |
तब ई मने कहलैं तोंय भगवान से तीन वरदान माँग | तोर मांग के भगवान पूरा काइर देवी । उमनकर कहेक मुताबिक तीन वर मांगलक |
पहिला उमनकर माय बाप के एक लड़का होय जाई |
दूसरा-उनकर माय बाप जे अन्या-अन्धी हैं आँइख खुल जाय और तीसरा उनकर होवे वाले पति सत्यावान के परिवार वाला खूब धनी मानी होय जाँय |
भगवान कर दोवा से इनकर तीनों वरदान पूरा होय गेलक | तब यमदूत मने कहेक लगलांय अब तो तोर तीनों वरदान तोके मिल गेलक, से ले तोंय हमरे मनकर पीछा छोइड़ दे और सत्यवान के लेगेक में बाधा ना डाल | तोंय घुईर जा |
फिर भी पार्वती उमन कर पीछा नी छोड़ेला आउर कहेला कि " तोहरे मने सत्यवान के न लेगा | छोइड देवा, तोहरे मनके मोंय गोड़ लगोना ।
तंग होय के उमाने भगवान से आउर एक वरदान माँगेक लागिन कहलांय तब पार्वती मॉगलक कि " यमदूत मने सत्यवान के छोइड़ देवोंक ऊ जी उठ जाओक |
भगवान इकर चौथा वरदान के भी पूरा काइर देलक | भगवान के आदेश से यमदूत मने सत्यवान के छोइड़ देलैं |
ऊकर जिउ उइठ गेलक । सत्यवान और पार्वती खुशी-खुशी अपन-अपन घर घूईर गेलांय | सत्यवान कर परिवार भी धनी-मानी होय जाय रहैं। से ले दूनों कर शादी बहुत धूम-धाम से होय गेलक | शादी कर बाद दोनों पति-पत्नी होइ के आराम से रहेक लगलांय |
पार्वती पहिले अपने भलाइ नी देइख के मॉय-बाप कर दुःख के दूर करलक । पहिला और दूसरा वरदान माँय-बाप ले माँगलक | तीसरा वरदान अपन होवेक वाला पति के परिवार केर लागिन माॉगलक और अन्तिम, चौथा वरदान अपन जिन्दगी खातिर अपन होवेक वाला पति ले माँगलक |
दुनिया में इकरे लेखे दूसर मन कर भलाइ करेक चाही। सेहे ले कहल जायल कि " कर्म ही धर्म है "
कहाँ रानी बेटी आउर कहाँ एक अत्यन्त गरीब और लाचार लड़का से शादी भेलक। से हे ले कहल गेलक है कि " भगवान सोबकर ले दुनिया में जोड़ी भेइज दे हैं "
एक टिप्पणी भेजें